Í þessum þætti, sem fór í loftið um vorið 1993 var fylgst með afhendingu íbúða í Höfn við Sólvangsveg á sumardaginn fyrsta, þar sem Þrestirnir sungu og Hörður Zóphaniasson afhenti fyrstu lyklana.
Í Hafnarborg léku þau Rúnar Óskarsson klarinettuleikari og Ingunn Hildur Hauksdóttir píanóleikari fyrir okkur Fantasiestykke eftir Carl Nielsen, en þau voru að undirbúa tónleika með Synfóníuhljómsveit Íslands vegna lokaprófa þeirra í Tónlistarskóla Reykjavíkur. Þar var einnig Gunnar Hjaltason, gullsmiður og listmálari sem sagði frá sýningu sinni.
Hafnarfjarðar apótek fagnaði 75 ára afmæli sínu og á sumardeginum fyrsta fylgdumst við með víðavangshlaupinu í Strandgötu og ræddum við Loga Tryggvason sem sigraði í flokki 10-12 ára, og Ásgeir Örn Hallgrímsson í flokki 8-9, en hann átti síðar langan og merkilegan feril sem atvinnumaður og landsliðsmaður í handbolta og þjálfar nú meistardeild Hauka.
Við mynduðum endurnýjun á öllum innviðum í Sparisjóðnum á Strandgötu, en innviðagjöldin greiddu bæjarbúar nokkrum árum síðar. Þá er viðtal við Dag Jónsson úr Fiskakletti um Íslandsmót í klifri, en við endum þessa syrpu með afmælisbarni dagsins, Ingibjörgu Ásgeirsdóttur á Heilsugæslunni, þegar samstarfsfólkið færðii henni „kaldar“ kveðjur. Ingibjörg er móðir Ásgeirs Arnar, sem áður er getið.
